Олунньу 13-23 күннэригэр Тыайа орто оскуолатыгар “Ийэ тылым – айылгым алгыһа” диэн саха тылын, суругун – бичигин декадата буолан ааста. Декада сүрүн сыалынан саха тылыгар, литературатыгар бииини сайыннарыы, саха суруйааччыларын ааттарын, айымньыларын үйэтитии,  айар, хоһоонноохтук ааҕар дьоҕуру сайыннарыы буолла.  Тэрээһини  саха тылын, литературатын учууталлара Вера Васильевна Федорова, Саргылаана Афанасьевна Старостина иилээн – саҕалаан ыыттылар.

Олунньу 13 күнүгэр, С.А.Новородов төрөөбүт күнүгэр чопчу түбэһиннэрэн,  саха тылын туһунан хоһооннору ааҕан, ыалдьыттары, учууталлары, үөрэнээччилэри сахалыы алаадьынан күндүлээн декада үөрүүлээхтик арылынна.

 Олунньу 15 күнүгэр кыра кылаастарга “Саха суругун – бичигин төрүттэниитэ” уопсай кылаас чааһа ыытылынна. Орто уонна улахан сүһүөхтэргэ “С.А.Новгородов – уһулуччулаах тыл учуонайа” кылаас чааһын В.В.Федорова тэрийэн ыытта. Манна учуутал учуонай саха суругар – бичигэр туох оруоллааҕын туһунан сиһилии кэпсээтэ, үөрэнээччилэр  интириэһиргиир боппуруостарыгар толору хоруйу биэрдэ.

Олунньу  16 күнүгэр бүтүн нэһилиэк уонна оскуола иһинэн сахалыы истэн суруйуу ыытылынна. Истэн суруйуу Н.Е.Мординов – Амма Аччыгыйа 110  сыллаах үбүлүөйүгэр анаан “Амма Аччыгыйа тыл туһунан” тиэкис буолла. Күрэх икки бөлөххө арахсан ыытылынна: анал учуутал үөрэхтээхтэригэр уонна араас идэлээх нэһилиэк олохтоохторугар. Манна нэһилиэккэ олохтоох дьаһалта сүрүннүүр специалиһа С.В.Семенова кыайыылааҕынан таҕыста. Учууталларга I миэстэни нуучча тылын, литературатын учуутала А.П.Аргунова , II миэстэни биология, химия учуутала Р.И.Левин, III миэстэни история, обществознание учуутала Т.М.Мухоплева ыллылар. Кыайыылаахтарга анал өйдөбүнньүк бэлэх туттарылынна.

Олунньу 17 күнүгэр эдэр учуутал В.В.Федорова ““Кыра” саха үөрэххэ баҕата” (Суорун Омоллоон “Хараҥаҕа тыкпыт сырдык” кэпсээнинэн) 5 кылаастарга ФГОС ирдэбилинэн аһаҕас уруок ыытта. Уруок сүрүн сыалынан оҕону кыра сааһыттан үөрэххэ умсугутуу, үрүҥү – хараны араара үөрэнэргэ, оҕоҕо аһыныгас санаа иэйиитин уһугуннарыы буолла.  Уруогу директоры үөрэх чааһыгар солбуйааччы, опыттаах учууталлар кэтээн көрөн сыаналаатылар, сүбэ – ама биэрдилэр. 

Маны таһынан, киэһэ 19:00 чааска олохтоох араадьыйаҕа “Мин сахабын – сахалыы саҥарабын” диэн ааттаан хоһоон ааҕыы ыллыга буолла. Манна 9-11кылаас үөрэнээччилэрэ саха поэттарын саха тылыгар анабыл хоһооннорун дорҕоонноохтук ааҕан дьон биһирэбилин ыллылар.

Олунньу 18 күнүгэр “ Төрөөбүт тыл – саха литературатыгар”  7-11 кылаас үөрэнээччилэрэ үс хамаандаҕа арахсан брейн – ринг оонньоотулар. Түмүккэ “Урааҥхай”  хамаанда утарсааччыларын 8 баалынан куоһаран кыайыылааҕынан таҕыста.

Олунньу 19 күнүгэр “Литература- олох сиэркилэтэ” ток – шоу төрөппүттри кытта холбоон ыытылынна.  Кыайыылааҕынан “Ньургуһун” хамаанда таҕыста. 

Оҕо ааҕар дьоҕурун сайыннарар сыалтан “Түргэн ааҕааччы” күрэх ыытылынна.  Манна кылаастан биирдии кыайыылаах быһаарылынна.

Олунньу 20 күнүгэр саха тылын, литературатын учуутала С.А.Старостина “Н.Е.Мординов “Сааскы кэм” романыгар утуо угэскэ угуйар Даарыйа эмээхсин “ диэн 8 кылааска кылаас таһынан аһаҕас уруок ыытта. Уруок сүрүн сыалынан оҕону сөптөөхтүк сахалыы тыыҥҥа иитии, угуйуу буолла.

Маны таһынан декада устата “Саха саарыннара” кинигэ быыстапкатын библиотекарь тэрийэн ыытта, “Сайдам” оҕо түмсүүтэ А.И.Софронов үбүлүөйдээх 130 сылыгар анаан “Алампа аартыгынан” Алампа олоҕун, айар үлэтин хаартыска нөҥүө сырдатар фотовыставка оҥорон оҕолорго кэпсээтэ. Ол түмүгүнэн уһун переменаҕа аттаран саха тылын учуутала В.В.Федорова Алампаҕа анаан викторина ыытта. Кыайыылааҕынан 10кылаас үөрэнээччитэ Айна Софронеева буолла.

Ону тэҥэ алын сүһүөх үөрэнээччилэригэр “Мин  - сахабын” өйтөн суруйуу күрэҕэ ыытылынна. Манна кыайыылааҕынан 3 кылаас үөрэнээччитэ Света Полятинская буолла. Улахан кылаастарга 9 кылаас үөрэнээччитэ Ангелина Гуляева кыайыылааҕынан таҕыста.  Декда устата саха тылын кабинетын сөргүтүүгэ үлэ ыытылынна.